آخر المواقف

سلام عليكم كيفك ي حلوة ان شاء الله طيبة

😭
😭
😊
♥

والله عصرت مخي لين لقيت هالموقف
لمن كنت دوبي عروس مالي شهر زوجي طلب مني اجهز قهوة وابخر المجلس امه واخواته بيجوني و قمت وسويت اللي طلبه و يوم جيت ابخر المجلس حطيت المبخرة فوق المركا ( المتكا اللي يتكوا عليها او التكاية او المسند ) المهم و رحت اسوي قهوة و لمن رجعت انصدمت بقوة حصلت فحم طايح فوق المركا ومسوي حفرة كبيرة و عميقة وانقلبت ريحة البخور لريحة حرق و تورطت مرة مدري ايش اسوي عشان اداري اللي صار قمت اخذت المركا و حطيتها ورا باب المطبخ لين اعلم زوجي باللي صار و مرت الليلة بسلام ومرت الايام والشهور وصار و طلع لنا حنش في المطبخ بعيد الشر عنكم وصارت حالة طوارئ بالبيت زوجي جاب اخوه و حصلوا الحنش ورا باب المطبخ و اغراضي اللي ورا الباب شالوها و تخلصوا من الحنش الحمدلله وبعد ما صحينا من الصدمة احصل زوجي يضحك بقوة ويقول انتي ايش المصيبة اللي سويتيها ومخبيتها ورا باب المطبخ وانا ما ادري ايش يقصد واعصر مخي اتذكر وقلتله والله مادري ايش سويت قام يقولي المركا حرقتيها وخبيتيها ورا الباب عشان لا اعصب عليكي واتذكر واقول اهااااااا وربي نسييييتها مرررة
راحت من بالي والله كنت بعلمك من وقتها انا خبيتها عشان امك واخواتك لايشوفوها ويضحك بزيادة ويقول لالا انتي خفتي ازعل منك لكن والله مافيه زعل اهم شي انتي سلمتي والبيت سلم بس مرة ثانية انتبهي
والحمدلله رب العالمين فعلا سلمنا من كل شر
تدرون انه كله من التحصين اليومي ؟؟!
تحصنوا يوميا

وانا صغيرة جونا حريم زيارة ووقت الصلاة كانت في واحده منهم طوويله وهو انا صغيره اشوفها طويله مره
المهم وتجي الحرمه تصلي ف امان الله واجي انا اطلع فوق الكنبه واقيس طولي ع طولها يدي من راسي احطها ع راسها وهي تصلي
ع اساس اخلي الاطفال اللي ع قدي شوفوا انا طويلة مثلها وبعد العزيمة لقيت تهزئة محترمه من امي

💔
🥲

R ~
قبل ١٩-٢٠ سنة تقريبًا امي ولدت اخوي والحريم جو نقطوها (اعطوها فلوس بمناسبة الولادة)
بعدها بيوم اختي اخذت كل الفلوس وجلست توزعهن على بنات صفها تقول امي معها فلوس

😂
😂
😂
😂
😂
😂
😂